sitam jagtay hain

                             غزل

             ستم جاگتے ہیں، کرم سو رہے ہیں
             محبت کے جاہ و حشم سو رہے ہیں

             مرے نکتہ سازو! سخن کے خداؤ
             پکارو! کہ لوح و قلم سو رہے ہیں

            ہر اک ذہن میں ہے خدائی کا دعوی
           ہر اک آستیں میں صنم سو رہے ہیں

             یہاں خوابِ راحت فریبِ یقیں ہے
           نہ تم سو رہے ہو نہ ہم سو رہے ہیں

               وہاں چاندنی کے قدم ڈولتے ہیں
             جہاں تیرے نقشِ قدم سو رہے ہیں

            تخیل میں ہیں گیسُوؤں کے بہانے
         نگاہوں میں رنگیں بھرم سو رہے ہیں

         مری اُجڑی اُجڑی سی آنکھوں میں ساغر
          زمانے کے رنج و الم سو رہے ہیں